ડીસા માર્કેટયાર્ડમાં સોમવારથી નવિન મગફળીની આવક શરૂ થઈ છે. જેમાં પ્રથમ દિવસે 1500 જેટલી બોરીની આવક નોંધાઇ છે અને પ્રતિ મણ (20 કિલો) મગફળીનો ભાવ 1101 થી 1201 રૂપિયા નોંધાયો છે. ડીસા સહિત બનાસકાંઠા જીલ્લાના મોટાભાગના વિસ્તારોમાં ઉનાળુ બાદ ચોમાસાની સિઝનમાં પણ ખેડૂતો મગફળીનું વાવેતર કરતાં થયાં છે. ચાલુ વર્ષે ડીસા પંથકમાં પણ પુષ્કળ પ્રમાણમાં મગફળીનું વાવેતર થયું હતું તેમજ સમયસર પિયત મળતાં મગફળીનો પાક પણ સોળે કળાએ ખીલી ઉઠ્યો છે.
વરસાદે વિરામ લેતાં ખેડૂતો મગફળીનો તૈયાર પાક લેવા કામે લાગી ગયા છે. તો બીજી તરફ તૈયાર થયેલો પાક ખેડૂતો બજારમાં વેચવા માટે લાવી રહ્યાં છે. ડીસા માર્કેટયાર્ડમાં સોમવારે મગફળીની 1500 જેટલી બોરીની આવક નોંધાઇ રહી છે તેમજ પ્રતિ મણ (20 કિલો) મગફળીનો ભાવ 1101 થી 1201 રૂપિયા નોંધાયો છે. આ અંગે ડીસા માર્કેટયાર્ડના સેક્રેટરી એ.એન.જોષીએ જણાવ્યું હતું કે, ચોમાસું મગફળીની આવક શરૂ થઈ છે અને ખેડૂતોને પણ પોષણક્ષમ ભાવ મળી રહ્યાં છે.