રિપોર્ટર પોપટલાલ દરજી બૌદ્ધિક ભારત ધાનેરા
ધાનેરા ધરણીધર શોપિંગમાં ગેસના ડીલરનું ગોડાઉન આવેલું હતું અને ત્યાં આજુબાજુ રહેણાંક વિસ્તાર હોવાથી અવાર-નવાર રજૂઆતો થતાં મામલતદારે સીઝ કર્યુ હતું. અને ગોડાઉન માલિક સામે કાર્યવાહી શરૂ કરી હતી. ધાનેરામાં શિવશક્તિ ગેસ એજન્સીનું ગોડાઉન પણ રહેણાંક તેમજ શોપિંગમાં આવેલું છે. આ બાબતે મામલતદારને રજૂઆતો મળતા પુરવઠા નાયબ મામલતદારને સાથે રાખીને બુધવારે તપાસ હાથ ધરી હતી. તપાસ કરતાં સ્ટોક કરતાં વધારે ગેસના બાટલાઓ મળી આવ્યા હતા. આ તપાસમાં આ ગોડાઉનમાં ઘરેલું તેમજ વાણિજ્ય ઉપયોગના ખાલી અને ભરેલા 82 બાટલાઓ મળી આવ્યા હતા. જેમાં કોમર્શિયલના બે બાટલા અને ઘરેલું વપરાશના ભરેલા 33 બાટલાઓ તેમજ 44 ખાલી બાટલાઓ આ ગોડાઉનમાં મળી આવ્યા હતા.ગોડાઉનના માલિક પ્રાગાભાઇ વિહાભાઇ પટેલની પુછપરછ કરવામાં આવતા કોઇ સંતોષકારક જવાબ ના મળતા આ ગોડાઉનને સીઝ કરવામાં આવ્યું હતું. આ અંગે ધાનેરા મામલતદાર અને પ્રોબેશનલ પ્રાંત અધિકારી સાજન મેરે જણાવ્યું હતું કે અમોને લોકોને ફરિયાદ મળતા આ ગોડાઉનની તપાસ કરવામાં આવતા આ ગોડાઉનમાં સ્ટોકપત્રક પ્રમાણે બાટલાઓ ન હોવાથી તેમજ માલિક દ્વારા સંતોષકારક જવાબ ન મળવાના કારણે, ગેસ સિલીન્ડર અનઅધિકૃત રીતે ઘરેલું તેમજ કોમર્શિયલ બાટલાઓ રાખેલા હતા. આ ગોડાઉન બજારની વચ્ચે જ્યાં લોકોની અવર-જવર મોટા પ્રમાણમાં રહે છે તેવી જગ્યાએ આ ગોડાઉન હતું. જેથી આ ગોડાઉનને તેમાં રાખેલ 82 બાટલાઓ સાથે સીઝ કરવામાં આવ્યું છે અને તે ગોડાઉનમાંથી એકપણ બાટલો વેચી કે અરસપરસ પણ કરી શકશે નહી.ગેસના બાટલા ભરેલ એક ટ્રક પણ પકડી હતી.